943 327 239 - Móvil - 648128445 - Paseo Zarategi 100 - 20015 Donostia fqeuskadi@gmail.com

FIBROSI KISTIKOAREN GAINEKO EUROPAKO PROIEKTUAREN BILERA BURGOSKO UNIBERTSITATEAN.

Ekimenaren muina molekula sintetiko txikiak erabiltzea da, anioiak zeluletan garraiatzean dagoen jarduera urria ordezteko gai izan daitezen.

UBU/DICYT (Universidad de Burgos / Agencia Iberoamericana para la Difusión de la Ciencia y la Tecnología). Urtarrilaren 14an eta 15ean, TAT-CF (terapia-mota berriak fibrosi kistikoaren tratamendurako, anioien transmintza garraiatzen duten molekula txikietan oinarrituta) proiektuaren sustapenerako bilera hartuko du Burgosko Unibertsitateak, bazkide koordinatzaile gisa.

Proiektu horrek fibrosi kistikoa izeneko gaixotasun arraroarentzako tratamendu berri baten bideragarritasuna aztertuko du. Proiektu hori Europako Batzordeak finantzatu du, I+G+B bultzatzen duen 2020 Horizontea programa-esparruaren barruan.

Ekimenaren muina molekula sintetiko txikiak erabiltzea da, anioiak zeluletan garraiatzean dagoen jarduera urria ordezteko gai izan daitezen.

Anbizio handiko proiektu bat da, ia 4,6 milioi euroko aurrekontu oso bat duena, eta Burgosko Unibertsitateak horietatik 650.000 euro baino zertxobait gehiago kudeatuko du zuzenean. Internazionalizazio, Kooperazio eta Ikerketaren errektoreorde Elena Vicentek ongi etorria emango die parte-hartzaileei bihar, ostegunean, urtarrilaren 14an, goizeko 09:00etan, Zerbitzu Zentralen Eraikinean.

Hori izango da partzuergoaren lehenengo bilera Europako Batzordeak proposamena onartu ondoren, eta bilera horrek balioko du proiektuari hasiera emateko. Izan ere, proiektuaren iraupena 36 hilabetekoa izatea aurreikusten da, eta 2018ko abenduaren 31n bukatuko da.

Partzuergoan eratutako proiektu bat da, eta proiektu horren ikertzaile nagusia Roberto Quesada da, Burgosko Unibertsitateko Kimika Saileko unibertsitate-irakasle titularra.

Burgosko Unibertsitateaz gain, proiektuan beste hiru ikerketa-zentrok parte hartzen duten bazkide gisa: Consejo Superior de Investigaciones Científicas (CSIC), Instituto Giannina Gaslini (Italia) eta Instituto di Biofisica, CNR (Italia); irabazi-asmorik gabeko bi erakunde, Steinbeis Innovation GmbH (Alemania) eta Bioneer A/S (Danimarka); eta bi enpresa, Biopraxis AEI (Espainia) eta Avidin Ktf (Hungaria).

TAT-CF proiektuaren (anioiak garraiatzeko molekula txikietan oinarritutako terapia-mota berriak fibrosi kistikoaren tratamendurako) helburua da fibrosi kistikoarentzako tratamendu berri posible baten bideragarritasuna ikertzea.

Fibrosi kistikoa gaixotasun arraro gisa ezagutzen da, eta arraza zuri kaukasiarrean eraginik handiena duen gaixotasun kroniko hereditarioetako bat da. Izan ere, bizirik jaiotzen diren ia 10.000 haurretik bati eragiten dio (25.000 pertsona baino gehiagori Europar Batasunean).

Egun, ez dago gaixotasun hori osatzen duen tratamendurik, soilik sintomak hobetzen dituen eta bizi-esperantzak luzatzen dituen tratamenduak daude, eta paziente hauen batez besteko bizi-iraupena mundu mailan 35 urtekoa da. Hilgarria izan daitekeen gaitza da, eta pazienteak hiltzen dira birikietan bakterioek sortutako infekzioekin lotutako konplikazioak izateagatik.

Gainera, egun erabiltzen diren botikekin soilik mutazio zehatz bat duten gaixoak zaindu daitezke. Era berean, Europar Batasun osoan egun erabiltzen diren tratamenduen kostuaren aldean, urtean 6.241 milioi eurora arte aurreztu daitezkeela uste da.

Gaixotasuna mutazio batek sortzen du, zeinak kloruroa eta bikarbonatoa bezalako anioiak zeluletan garraiatzeko ardura duen proteina bati eragiten baitio, eta horrek hainbat organori eragiten dio, hala nola birikiei, pankreari, gibelari eta hesteari, eta ondorioz, mukia pilatzen da eremu horietan.

TAT-CF Proiektuaren helburua da fibrosi kistikoko terapietan kontzeptu erabat berrietan oinarritzen diren sendagai berri eta berritzaileen garapen aurre-klinikoa osatzea, hau da, helburua da gaixotasunaren jatorriaren aurka borrokatzea, molekula sintetiko txikien bidez ordeztu ahal izateko anioiak zeluletan garraiatzean dagoen jarduera urria. Horrela, TAT-CF proiektuan ikertuko den tratamendua, a priori behintzat, paziente guztiei ezarri ahal izango zaie, bakoitzaren mutazio genetikoa alde batera utzita.

Proiektu hau Europa osoko beste 420 proposamenekin lehiatu behar izan zen onartua izan baino lehen. Haietatik 10 aukeratu ziren azkenean; ondorioz, % 2,4ko arrakasta maila izan zuen soilik.

Gainera, deialdi horretan, Burgosko Unibertsitatea proiektu bat koordinatzen duen Espainiako erakunde bakarra da. Proiektu horrekin, Europako hamar proiektutan parte hartu du dagoeneko Burgosko Unibertsitateak, eta horietako lautan bazkide koordinatzaile gisa.

BERRIA:DICYT

Hau berri libre dago: Español